Культурна-пазнаваўчы турызм
Шматвяковая гісторыя беларускай зямлі і самабытная культура яе народа адлюстравана ў многіх помніках гісторыі і культуры (больш за 17,5 тыс. аб′ектаў), з якіх звыш 5 тыс. увайшлі ў Дзяржаўны рэестр гісторыка-культурных каштоўнасцей і актыўна ўключаюцца ў аб′екты экскурсійнага паказу.
Адной з самых вядомых славутасцей па праве лічыцца Мірскі замак, які ўключаны ў Спіс сусветнай спадчыны ЮНЕСКА. Гэты выдатны прыклад абароннага дойлідства XVI ст. адначасова спалучае ў сабе рысы готыкі, барока і рэнесансу.
Нясвіжскі палацава-паркавы комплекс – жамчужына беларускай архітэктуры, таксама занесены ЮНЕСКА ў Спіс сусветнай культурнай і прыроднай спадчыны. Уладальнікі палаца, самымі вядомымі з якіх былі Радзівілы, некалькі разоў перабудоўвалі яго, у сувязі з чым палац нясе ў сабе рысы шматлікіх архітэктурных стыляў.
У Спіс сусветнай культурнай і прыроднай спадчыны ЮНЕСКА ўваходзяць таксама ўнікальны прыродна-культурны комплекс "Белавежская пушча" і геадэзічныя пункты градусных вымярэнняў Дугі Струве, па якіх можна здзейсніць тэматычныя падарожжы.
На тэрыторыі Беларусі размешчана значная колькасць старажытных гарадоў – Полацк, Навагрудак, Тураў, Гродна, Нясвіж, Заслаўе і іншыя, якія з′яўляюцца найбольш наведвальнымі турыстычнымі аб′ектамі.
У краіне налічваецца сотні музейных экспазіцый, галерэй і выставачных залаў. У іх захоўваецца больш за 2,8 млн экспанатаў – унікальных помнікаў нацыянальнай і сусветнай культуры. Найбуйнейшымі сярод музеяў з′яўляюцца Нацыянальны мастацкі музей Рэспублікі Беларусь, Нацыянальны гістарычны музей Рэспублікі Беларусь, Беларускі дзяржаўны музей гісторыі Вялікай Айчыннай вайны і інш.
Спасылкі на інтэрнэт-рэсурсы
Гісторыка-культурны музей-запаведнік "Заслаўе"Музейны комплекс старадаўніх рамёстваў і тэхналогій "Дудуткі"
Нацыянальны гісторыка-культурны запаведнік "Нясвіж"
Нацыянальны Полацкі гісторыка-культурны музей-запаведнік