Сельская гаспадарка
Сельская гаспадарка з'яўляецца адной з важнейшых галін эканомікі Беларусі і галоўным складнікам аграпрамысловага комплексу (АПК) краіны. У рэспубліцы на 1 студзеня 2020 г. налічвалася 1382 сельскагаспадарчых арганізацыі, 2 794 фермерскіх гаспадаркі, звыш 1 млн асабістых падсобных гаспадарак. Прыярытэтным напрамкам развіцця АПК была і застаецца буйна-таварная вытворчасць. Сельскагаспадарчыя арганізацыі, уключаючы фермерскія гаспадаркі, вырабляюць каля 80% прадукцыі аграрнага сектара, гаспадаркі насельніцтва (асабістыя падсобныя і іншыя) – звыш 17%.
Беларусь практычна поўнасцю забяспечвае сябе харчаваннем, якога дастаткова для задавальнення ўнутраных патрэб з улікам плацёжаздольнага попыту насельніцтва краіны. Імпарт прадуктаў харчавання складае менш за 10% ад усяго аб'ёму спажывання. Асноўнымі відамі прадукцыі беларускай сельскай гаспадаркі з'яўляюцца малако, мяса жывёлы і птушкі, збожжа, бульба, гародніна, цукровыя буракі і льняная сыравіна. Каб павысіць давер спажыўцоў да сваёй прадукцыі, беларускія вытворцы ўкараняюць сістэмы забеспячэння якасці і бяспекі харчовай прадукцыі. Тэхнічнае перааснашчэнне прадпрыемстваў мясной і малочнай прамысловасці дазволіла сертыфікаваць у звыш 80 падраздзяленнях прадпрыемстваў міжнародную сістэму якасці.
Па аб'ёмах вытворчасці асноўных відаў сельгаспрадукцыі Беларусь з'яўляецца адным з лідэраў сярод краін постсавецкай прасторы. Вытворчасць сельгаспрадуктаў на душу насельніцтва адпавядае ўзроўню развітых краін і па многіх пазіцыях (вытворчасць бульбы, цукровых буракоў, мяса, малака) перавышае паказчыкі, дасягнутыя ў краінах СНД. Прадпрыемствы АПК працуюць як на ўнутраны, так і на знешні рынкі, гатовыя да плённага і ўзаемавыгаднага эканамічнага супрацоўніцтва па ўсім спектры кірункаў сваёй дзейнасці. Доля экспарту сельскагаспадарчай прадукцыі і прадуктаў харчавання ў адносінах да яго агульнага аб'ёму складае 16,8%. Каталог прадпрыемстваў харчовай прамысловасці нашай краіны і замежных кампаній, з якімі наладжана супрацоўніцтва, прадстаўлены на Беларускім харчовым гандлёва-прамысловым партале Прадукт. by.
У мэтах стварэння ўмоў для ўстойлівага развіцця аграпрамысловага комплексу прынята Дзяржаўная праграма «Аграрны бізнес» на 2021–2025 гады. Выкананне яе мерапрыемстваў павінна забяспечыць станоўчую дынаміку вытворчасці сельскагаспадарчай прадукцыі.
Спасылкі на інтэрнэт-рэсурсы
Міністэрства лясной гаспадаркі Рэспублікі Беларусь
Міністэрства сельскай гаспадаркі і харчавання Рэспублікі Беларусь
Навукова-практычны цэнтр Нацыянальнай акадэміі навук Беларусі па жывёлагадоўлі
Рэспубліканская лесапрамысловая асацыяцыя
Export.by. Партал інфармацыйнай падтрымкі экспарту