Свабодная эканамічная зона
Свабодная эканамічная зона (СЭЗ) у Беларусі разглядаецца як частка тэрыторыі краіны з дакладна вызначанымі межамі і спецыяльным прававым рэжымам, які ўстанаўлівае спецыяльны парадак і ўмовы падаткаабкладання, валютнага, мытнага і іншага рэгулявання.
Развіццё СЭЗ накіравана на рэалізацыю такіх задач, як:
- павелічэнне прытоку замежных інвестыцый, паляпшэнне інвестыцыйнага клімату і прыцягненне стратэгічных інвестараў;
- забеспячэнне спрыяльных умоў для прыцягнення новых і высокіх тэхналогій і перадавога замежнага вопыту;
- стымуляванне экспарту і развіццё імпартазамяшчальных вытворчасцей;
- стварэнне новых рабочых месцаў.
Як і ва ўсім свеце, рэжым СЭЗ прадастаўляе прадпрыемствам магчымасць працаваць у спецыяльных ільготных умовах.
Тэрыторыя СЭЗ з’яўляецца часткай мытнай тэрыторыі Рэспублікі Беларусь.
У сучасны момант у Беларусі створаны і працуюць шэсць свабодных эканамічных зон:
СЭЗ "Брэст" (1996). У СЭЗ выпускаецца больш за тысячу назваў прамысловай прадукцыі і тавараў, у тым ліку электратэхнічныя вырабы, машыны і абсталяванне дарожнай разметкі, фарбы і эмалі, газавыя і электрапліты, мэбля, морапрадукты, мясныя і кандытарскія вырабы. У сучасны момант СЭЗ прымае інвестыцыі на стварэнне прадпрыемстваў з выкарыстаннем высокіх тэхналогій у фармацэўтычнай, аўтамабільнай, электроннай, машынабудаўнічай і іншых галінах прамысловасці.
СЭЗ "Віцебск" (1999). Асноўныя вытворчыя кірункі інвестыцыйных праектаў, якія рэалізуюцца ў СЭЗ, – паліўная, ветэрынарная, хімічная прамысловасць, машынабудаванне, навука і навуковае абслугоўванне, лёгкая і харчовая прамысловасць, электроніка.
СЭЗ "Гомель-Ратон" (1998). У СЭЗ размешчаны высокатэхналагічныя прадпрыемствы радыёэлектронікі, прыборабудавання, машынабудаўнічай, электратэхнічнай і кабельнай прамысловасці. Усе прадпрыемствы маюць свабодныя вытворчыя плошчы, складскія памяшканні, развітую інфраструктуру, поўны комплекс інжынерных камунікацый.
СЭЗ "Гроднаінвест" (2002). За гады свайго функцыянавання СЭЗ стала эфектыўнай пляцоўкай для развіцця бізнесу ў Гродзенскай вобласці. Сёння рэзідэнтамі СЭЗ з'яўляюцца 69 прадпрыемстваў у сферы дрэваапрацоўкі і мэблевай вытворчасці, машынабудавання і металаапрацоўкі, харчовай і лёгкай прамысловасці, сельскай гаспадаркі з аб'ёмам вытворчасці больш як $ 1.4 млрд. Яны фарміруюць чвэрць усёй вытворчасці рэгіёну, складаюць трэцюю частку экспарту. Свае сродкі ў рэалізацыю праектаў ўнеслі інвестары з 35 краін свету.
СЭЗ "Мінск" (1998). Стварэнне СЭЗ з’явілася эфектыўным інструментам эканамічнай палітыкі дзяржавы па фарміраванні спрыяльнага інвестыцыйнага і прадпрымальніцкага клімату ў рэгіёне. За час сваёй дзейнасці СЭЗ «Мінск» стала галоўным прамысловым цэнтрам і прыцягнула інвестыцый на суму больш за 2 млрд. долараў ЗША. Кампаніі з 20 краін свету ўклалі капітал у бізнес на тэрыторыі СЭЗ: асноўныя краіны-інвестары – Расія, Кіпр, Вялікабрытанія, Германія, Эстонія, Латвія, ЗША. На дадзены момант у СЭЗ зарэгістравана больш за 115 рэзідэнтаў. 67 краін свету імпартуюць прадукцыю, якая выпускаецца прадпрыемствамі-рэзідэнтамі.
СЭЗ "Магілёў" (2002) складаецца з 12 участкаў агульнай плошчай 2 840,7 га. На тэрыторыі ёсць 148 тыс. кв. м вытворчых плошчаў, якія не выкарыстоўваюцца і з’яўляюцца прыгоднымі для размяшчэння вытворчасці. Усе ўчасткі СЭЗ вылучаюцца развітай інжынерна-транспартнай інфраструктурай.