Дзяржава і права

Рэспубліка Беларусь – унітарная дэмакратычная сацыяльная прававая дзяржава. Кіраўніком дзяржавы з’яўляецца Прэзідэнт. Правы, абавязкі і статус Прэзідэнта Рэспублікі Беларусь рэгламентуюцца Канстытуцыяй Рэспублікі Беларусь, законам "Аб Прэзідэнце Рэспублікі Беларусь"  і іншымі заканадаўчымі актамі.

Дзяржаўная ўлада ў Рэспубліцы Беларусь ажыццяўляецца на аснове раздзялення яе на заканадаўчую, выканаўчую и судовую.

Заканадаўчую ўладу ажыццяўляе Парламент – Нацыянальны сход Рэспублікі Беларусь. Парламент складаецца з 2-х палат: Палаты прадстаўнікоў і Савета Рэспублікі.

Выканаўчую ўладу ажыццяўляе Урад  – Савет Міністраў Рэспублікі Беларусь, які ўзначальвае Прэм’ер-міністр. Прэм’ер-міністр прызначаецца Прэзідэнтам Рэспублікі Беларусь са згоды ніжняй палаты Парламента. Урад у сваёй дзейнасці падсправаздачны Прэзідэнту Рэспублікі Беларусь. Прэзідэнт мае права па ўласнай ініцыятыве прыняць рашэнне аб адстаўцы Урада і вызваліць ад пасады любога члена Урада.

Cудовая ўлада ажыццяўляецца праз сістэму судоў, якая будуецца на прынцыпах тэрытарыяльнасці і спецыялізацыі. Яна складаецца з Канстытуцыйнага Суда і сістэмы судоў агульнай юрысдыкцыі: Вярхоўнага Суда Рэспублікі Беларусь, абласных, Мінскага гарадскога судоў, эканамічных судоў абласцей, горада Мінска, раённых і гарадскіх судоў. Судовая ўлада ажыццяўляецца праз канстытуцыйнае, грамадзянскае, крымінальнае, гаспадарчае і адміністрацыйнае судаводства.

Дзяржаўныя органы ў межах сваіх паўнамоцтваў самастойныя. Яны ўзаемадзейнічаюць паміж сабой, стрымліваюць і ўраўнаважваюць адзін аднаго.  Сістэма органаў дзяржаўнай улады краіны ўключае ў сябе:

• Прэзідэнта Рэспублікі Беларусь (Главу дзяржавы);
• Парламент (Нацыянальны сход Рэспублікі Беларусь: Палату прадстаўнікоў і Савет Рэспублікі);
• Урад (Савет Міністраў Рэспублікі Беларусь);
• суды;
• Генеральную пракуратуру Рэспублікі Беларусь;
• Камітэт дзяржаўнага кантролю Рэспублікі Беларусь;
• органы мясцовага кіравання і самакіравання. 
  

Адзінай крыніцай дзяржаўнай улады ў Рэспубліцы Беларусь з’яўляецца народ. Народ ажыццяўляе сваю ўладу як праз прадстаўнічыя і іншыя дзяржаўныя органы, так і непасрэдна ў формах і межах, вызначаных Канстытуцыяй краіны.

Дзяржава, усе яе органы і службовыя асобы дзейнічаюць у межах Канстытуцыі Рэспублікі Беларусь і іншых прынятых у адпаведнасці з ёю нарматыўных прававых актаў. Такім чынам, зацвярджаецца і рэалізуецца прынцып вяршэнства права.

Вышэйшай каштоўнасцю і мэтай грамадства і дзяржавы ў Рэспубліцы Беларусь з’яўляюцца чалавек, яго правы, свабоды і гарантыі іх рэалізацыі.