15 лютага 1945 года. 84 дні да Перамогі

У 7-м нумары газеты «Чырвоны сцяг» паведамляецца аб  ўзяцці нашымі войскамі Будапешта. (Газета «Чырвоны сцяг» выходзіла ў Давід-Гарадоцкім раёне Пінскай вобласці, цяпер тэрыторыя раёна знаходзіцца ў складзе Столінскага раёна Брэсцкай вобласці).

«Франтавое заданне выканана» – пад такім загалоўкам работнікі раёна ў адказ на перамогі Чырвонай Арміі зрабілі справаздачу аб сваіх справах  – «ўсенароднай дапамогай фронту». Так, план першага квартала 1945 года па падрыхтоўцы і вывазцы лесу ў некаторых сельсаветах выкананы на 104-120 %, а план 1944 года па будаўніцтву мастоў у раёне перавыкананы на 591 %.

Актыўна ідзе падрыхтоўка да веснавых палявых работ – неабходна падрыхтаваць насенне і інвентар, разлічыць цяглавую сілу. Праца ўскладняецца тым, што большая частка рабочых коней і валоў была вывезена ў Нямеччыну, інвентар спалены. Таксама яшчэ не ва ўсіх сельсаветах жыхарам вернуты зямельныя ўчасткі, адабраныя ў іх пры немцах. Газета нагадвае: нягледзячы на ​​ўсе цяжкасці, план веснавой пасяўной павінен быць выкананы. У хуткім часе пачне працаваць мясцовая радыёстанцыя  – абсталяванне для яе ўжо ўстаноўлена. На дадзены момант да раённага радыёвузла падлучаны 142 пункты, 2 рэпрадуктары ўстаноўлены на базарнай плошчы і ў цэнтры Давід-Гарадка. Апошнія навіны ў сельскія саветы раёна перадаюцца па тэлефоне, а далей, жыхарам вёсак, – па ўстаноўленых рэпрадуктарах. (Сёння, з нашай зручнай інтэрнэт-і тэлефоннай прасторы нам цяжка ўявіць такую ​​камунікацыю –  заўв. аўт.).

Не абыйдзем увагай навіны культуры і бібліятэчнай справы. Толькі што скончыўся агляд мастацкай самадзейнасці сярод школ. А ў вёсцы Альпень Веляміцкага сельсавета на Брэстчыне адкрылася хата-чытальня, укамплектаваная газетамі і кнігамі.