Для гасцей і ўдзельнікаў II Еўрапейскіх гульняў
Еўрапейскія гульні – найважнейшыя па значнасці пасля Алімпійскіх гульняў міжнародныя комплексныя спаборніцтвы сярод спартсменаў Еўропы. Яны праводзяцца раз у чатыры гады пад кіраўніцтвам Еўрапейскіх алімпійскіх камітэтаў.
Месцам правядзення II Еўрапейскіх гульняў на 45-м пасяджэнні Генеральнай асамблеі Еўрапейскіх алімпійскіх камітэтаў (21 кастрычніка 2016 г.) быў абраны Мінск. І гэта не выпадкова: Беларусь з поўным правам можна назваць спартыўнай краінай, краінай высокіх спартыўных дасягненняў. Тут пабудаваны і паспяхова функцыянуюць унікальныя спартыўныя збудаванні, шматлікія аб'екты фізкультурна-спартыўнага прызначэння. У рэспубліцы прынята Дзяржаўная праграма развіцця фізічнай культуры і спорту ў Рэспубліцы Беларусь на 2016–2020 гады. У краіне найбольш папулярныя лёгкая атлетыка, футбол, гімнастыка, лыжны спорт, хакей, тэніс, фехтаванне, барацьба, валейбол, гандбол, плаванне, шахматы і шашкі.
II Еўрапейскія гульні будуць праходзіць з 21 па 30 чэрвеня 2019 г. Іх падрыхтоўка і правядзенне ажыццяўляецца пад кіраўніцтвам Фонду "Дырэкцыя II Еўрапейскіх гульняў 2019 года" і Рэспубліканскага арганізацыйнага камітэта па падрыхтоўцы і правядзенні II Еўрапейскіх гульняў 2019 г. у Рэспубліцы Беларусь.
Падчас Гульняў больш за 4000 спартсменаў з 50 краін разыграюць 199 камплектаў медалёў па 15 відах спорту і 23 дысцыплінах.
Месцам правядзення спаборніцтваў стануць найбуйнейшыя спартыўныя аб'екты Беларусі. Найбольшая колькасць спаборніцтваў адбудзецца на Мінск-арэне. Спаборніцтвы пройдуць таксама ў цэнтры Мінска – па праспекце Незалежнасці і вуліцах цэнтральнай часткі горада, якія ўтвараюць трасу для шашэйных гонак даўжынёй 15 км.
Яркімі, унікальнымі падзеямі спартыўнага і культурнага жыцця Беларусі і Еўропы стануць цырымоніі адкрыцця і закрыцця Гульняў, якія адлюструюць дух, самабытную культуру і традыцыі беларускага народа. Гэтыя цырымоніі разгорнуцца на Нацыянальным алімпійскім стадыёне «Дынама».
Падчас II Еўрапейскіх гульняў у Беларусі будуць працаваць дзесяць фан-зон. У Мінску яны размесцяцца каля Палаца спорту, Мінск-арэны і Чыжоўка-арэны. Сем фан-зон будзе арганізавана ў рэгіёнах Беларусі.
Беларуская сталіца гасцінна прыме ўдзельнікаў спаборніцтваў, шматлікіх аматараў і турыстаў. Для іх устаноўлены бязвізавы ўезд у Беларусь. Яго парадак вызначаны Указам Прэзідэнта Рэспублікі Беларусь "Аб мерах па падрыхтоўцы і правядзенні II Еўрапейскіх гульняў 2019 года". Для ўдзельнікаў і арганізатараў Еўрапейскіх гульняў, іншых асоб, якія ўдзельнічаюць у іх падрыхтоўцы і правядзенні, бязвізавы парадак уезду вызначаны з 20 мая па 10 ліпеня, для замежных балельшчыкаў – з 10 чэрвеня па 10 ліпеня.
Набыць білеты на ўсе спаборніцтвы з улікам віду спорту і месца правядзення можна на сайце афіцыйнага білетнага аператара Гульняў – ТАА «Тикетпро». Прадугледжаны ільготныя білеты для людзей з дадатковымі патрэбамі.
Інфармацыя аб бязвізавым перамяшчэнні праз пункт пропуску Нацыянальнага аэрапорта "Мінск" прадстаўлена на сайце Міністэрства замежных спраў Рэспублікі Беларусь, па пытаннях мытнага рэгулявання – на сайце Дзяржаўнага мытнага камітэта Рэспублікі Беларусь.
Аб найбольш зручных і камфортных шляхах ў Беларусь і набыцці білетаў на розныя віды транспарту інфармуе партал афіцыйнага турыстычнага аператара II Еўрапейскіх гульняў – РУП «ЦэнтрКурорт» Vetliva. Тут можна забраніраваць пражыванне ў Мінску і за яго межамі, замовіць трансфер для індывідуальных турыстаў і груп.
Удзельнікі і госці II Еўрапейскіх гульняў маюць унікальную магчымасць пазнаёміцца з Беларуссю, яе прыгажосцю і культурнымі традыцыямі. Для іх рыхтуецца разнастайная культурная праграма, прапануюцца розныя экскурсійныя паслугі. Асобным турыстам і арганізаваным групам аматараў тураператар Vetliva прадастаўляе магчымасць арганізаваць карпаратыўныя туры і экскурсіі па Беларусі, забраніраваць экскурсійныя паслугі. Цікавыя і займальныя экскурсійныя туры з мэтай знаёмства з гістарычным мінулым Беларусі арганізуе таксама турыстычны агент II Еўрапейскіх гульняў – кампанія "Вакол свету".
Турыстычны патэнцыял краіны вельмі значны і адрозніваецца дэталёвай распрацаванасцю шматаспектных турыстычных маршрутаў. Зацікаўленым прапануюцца займальныя падарожжы ў рамках культурна-пазнаваўчага, актыўнага, ваенна-гістарычнага, дзелавога, лячэбна-аздараўленчага, рэлігійнага і іншых відаў турызму.
Спартсмены, аматары, госці II Еўрапейскіх гульняў могуць скласці індывідуальныя праграмы знаёмства з культурай і мастацтвам Беларусі. Гэта дасць магчымасць атрымаць уяўленне аб нацыянальных адметнасцях беларускай літаратуры, кінамастацтва, пазнаёміцца з архітэктурнай спадчынай, у тым ліку помнікамі архітэктуры, уключанымі ЮНЕСКА ў Спіс сусветнай культурнай спадчыны, дасягненнямі тэатральнага, музычнага і выяўленчага мастацтва.
Адным са знакавых турыстычных аб'ектаў з'яўляецца Нацыянальная бібліятэка Беларусі - своеасаблівая візітная картка краіны. У гасцей Мінска ёсць магчымасць пазнаёміцца з яе ўнікальным архітэктурным комплексам як непасрэдна, так і віртуальна, а таксама палюбавацца відамі горада з агляднай пляцоўкі. Звярнуўшыся да створаных бібліятэкай і яе партнёрамі электронных рэсурсаў, можна знайсці інфармацыю аб сваёй гістарычнай радзіме.
Да паслуг гасцей Гульняў – Карта Госця Мінска. Яна дае права аднаразовага наведвання (бясплатна або са зніжкай) музеяў і экскурсій, мастацкіх галерэй, права атрымання зніжак да 20% у гатэлях, рэстаранах, кафэ, крамах і на пракат аўтамабіляў. Карта Госця – гэта таксама электронны праязны на гарадскі транспарт. На сайце Карты Госця можна выбраць неабходны фармат карты, даведацца, як яна працуе і дзе яе можна набыць.
Найбуйнейшы мабільны аператар Беларусі – МТС – для замежных гасцей з мэтай забеспячэння магчымасці дзяліцца ўражаннямі і фота прапануе тарыф «Супер max» c безлімітным інтэрнэтам на сацыяльныя сеткі, мессенджэры і YouTube.
Асноўным інфармацыйным рэсурсам II Еўрапейскіх гульняў з'яўляецца афіцыйны сайт https://minsk2019.by/.
Тэлетрансляцыі з беларускіх арэн для аматараў спорту ў 160 краінах у якасці асноўнага партнёра хатняга вяшчальніка II Еўрапейскіх гульняў (іспанскай кампаніі International Sports Broadcasting (ISB) будзе ажыццяўляць Белтэлерадыёкампанія. Разам з трансляцыяй цырымоній адкрыцця і закрыцця II Еўрапейскіх гульняў яна таксама рэалізуе тэлевізійныя праекты "Нашы гульні" і «Гульні.by», у якіх асвятляюцца актуальныя навіны і дэталі падрыхтоўкі самай маштабнай мультыспартыўнай падзеі на тэрыторыі Беларусі.
Медыяпартнёрамі Гульняў ад Беларусі выступаюць тэлеграфнае агенцтва БелТА і выдавецкі дом «Беларусь сёння». БелТА сумесна з Беларускім дзяржаўным архівам кінафотафонадакументаў рэалізуе спецыяльны мультымедыйны праект «Старонкі беларускага спорту».
Яркія ўражанні ад спартыўных спаборніцтваў, сувеніры на памяць, набытыя ў гандлёвых цэнтрах Беларусі, зробяць II Еўрапейскія гульні незабыўнымі!
Спасылкі на інтэрнэт-рэсурсы
Дзяржаўны пагранічны камітэт Рэспублікі Беларусь
Дзяржаўны мытны камітэт Рэспублікі Беларусь
Міністэрства замежных спраў Рэспублікі Беларусь
Міністэрства спорту і турызму Рэспублікі Беларусь
Афіцыйны партал Нацыянальнага агенцтва па турызме
Афіцыйны сайт Рэспублікі Беларусь. Вelarus.by
Афіцыйны турыстычны партал Беларусі. Belarus. Travel
Беларускае тэлеграфнае агенцтва
Выдавецкі дом «Беларусь сёння»
Галоўнае ўпраўленне спорту і турызму Мінгарвыканкама
Інфармацыйна-турысцкі цэнтр "Мінск"
Нацыянальны алімпійскі камітэт Рэспублікі Беларусь