Закрыть
image description
image description
image description
image description
image description
image description
image description
image description

22 сакавіка 1945. 49 дзён да Перамогі

Калгасы БССР рапартуюць рэспубліцы пра гатоўнасць да веснавых палявых работ. Гомельскі лесатэхнічны інстытут абвясціў аб прыёме на вучобу. Паказ дакументальнага фільма «Народные мстители». Газеты: «Большэвік Палесся» (№ 27), «Віцебскі рабочы» (№ 28), «Луч» (Іўеўскі раён) (№ 17).

У мірных клопатах краіны ў гэтыя дні няма больш актуальнай задачы, чым падрыхтоўка ў поўным узбраенні да веснавой сяўбы, да ўсіх веснавых палявых работ. У газеце «Віцебскі рабочы» (№ 28) калгас імя Сталіна – адзін з перадавых у вобласці, – рапартуе аб сваёй гатоўнасці і абяцае ўтрымаць заваяванае раней першынство. У мінулым годзе калгас за высокі ўраджай і аднаўленне жывёлагадоўлі атрымаў Пераходны Чырвоны Сцяг Савета народных камісараў БССР. Такім чынам, што ж кажуць калгаснікі? Камсамольцы заняты ўгнаеннямі, выступаюць перад калгаснікамі з дакладамі, падрыхтавалі драматычныя пастаноўкі, якія на працягу палявога сезона пакажуць аднавяскоўцам. Адказныя за падрыхтоўку кароў у якасці цяглавай сілы прызвычаілі іх да культывацыі, баранавання і лёгкіх транспартных работ. Кавалі метадычна выконвалі складзены раней план рамонту інвентара, адсутнічаючыя дэталі «здабылі з разбітых нямецкіх аўтамашын і танкаў», якія засталіся пасля ваенных дзеянняў, а выканаўшы свой план на 12 дзён раней – зараз дапамагаюць суседнім калгасам. Кладаўшчык калгаса радуецца якасці пасяўнога матэрыялу: «золата, а не збожжа!» Сяляне спадзяюцца, а з імі і ўся краіна – ураджай будзе!

Артыкулы ў газеце «Большэвік Палесся» (№ 27) таксама актыўна нагадваюць пра вясну. Перадавіца заклікае «Паскорыць тэмпы вывазкі ўгнаенняў» на палі. Уся другая паласа прысвечана спаборніцтву за ўзорную работу машынна-трактарных станцый (МТС) і машынна-трактарных майстэрняў (МТМ) у БССР. А ў адказ на заклік трактарыстаў Прапойскай МТС работнікі Хойніцкай МТС да запланаванага тэрміну цалкам выканалі план рамонту. Калгаснікі калгаса імя Калініна Мазырскага раёна правялі пробны выезд: 17 добра ўкормленых коней і 8 навучаных кароў вывелі ў поле, праверылі інвентар – з 18 плугоў 1 апынуўся ўсё ж няспраўным.

Вайна нанесла страты не толькі сельскай, але і лясной гаспадарцы, – для аднаўлення лясных масіваў і правільнага выкарыстання лясных рэсурсаў патрэбны новыя кадры. Пасля вяртання з эвакуацыі Гомельскі лесатэхнічны інстытут аднаўляе сваю працу: вучні, якія атрымалі ў 1944 г. атэстаты аб сярэдняй адукацыі, могуць быць прыняты без экзаменаў на факультэт «Механізацыя лесараспрацовак і лесотранспорта» («Большэвік Палесся", № 27, с. 4).

У Іўеўскім раёне Гродзенскай вобласці ў доме сацыялістычнай культуры з вялікім поспехам дэманструецца новы дакументальны фільм «Народные мстители» (пра дзейнасць партызан на тэрыторыі СССР) – у першы ж дзень яго паглядзелі 500 чалавек, паведаміла газета «Луч» Ивьевского района Гродненской области (№ 17). На наступнай старонцы гэтай газеты – артыкул «Не забудземся, не даруем» з хронікай расстрэлаў жыхароў у мястэчку Іўе падчас нямецкай акупацыі, тут жа пералічаны і прозвішчы катаў.

Але жыццё працягваецца: адкрыты дзве новыя школы – у вёсцы Лукошына і вёсцы Сонтыкі. Паступова выходзяць на першы план і іншыя задачы мірнага жыцця: таварыш Цімафеева заклікае кіраўнікоў прадпрыемстваў і школ "не спачываць на лаўрах» і не сядзець «вакол у гразі», а навесці належны санітарны парадак.

Да Перамогі застаецца 49 дзён ...